پنجاب اسمبلی کی تحلیل کا نوٹی فکیشن جاری

لاہور (مسائل نیوز) پنجاب اسمبلی کی تحلیل کا باقاعدہ نوٹی فکیشن بھی جاری کردیا گیا۔ میڈیا رپورٹس کے مطابق صوبائی محکمہ قانون نے پنجاب اسمبلی کی تحلیل کا گزٹ نوٹیفکیشن جاری کیا، صوبائی محکمہ قانون کی جانب سے جاری کردہ نوٹیفکیشن کے بعد پنجاب اسمبلی باقاعدہ طور پر تحلیل ہو گئی ہے، نوٹیفکیشن میں کہا گیا ہے کہ اسمبلی وزیراعلیٰ پرویزالہٰی کی وایڈوائس پر تحلیل ہوئی، اسمبلی 14 جنوری کی رات 10 بج کر 10 منٹ پر تحلیل ہوگئی۔
ادھر گورنر پنجاب بلیغ الرحمان نے وزیراعلیٰ اور قائد حزب اختلاف پنجاب اسمبلی کو نگراں وزیراعلیٰ کی تقرری کے معاملے پر مراسلہ جاری کردیا، مراسلے میں گورنر پنجاب نے نگراں وزیراعلیٰ کیلئے متفقہ نام طلب کرتے ہوئے لکھا ہے کہ پنجاب اسمبلی اور کابینہ تحلیل ہوچکی ہیں، وزیراعلیٰ اور قائد حزب اختلاف کے مشورے سے نگران وزیراعلیٰ کا تقرر کیا جائے گا، نگراں وزیراعلیٰ کا نام تین دن یعنی 17 جنوری رات 10 بجکر 10منٹ تک دے دیا جائے۔
بتاتے چلیں کہ گورنر پنجاب بلیغ الرحمان کی جانب سے اسمبلی کی تحلیل کی سمری پر دستخط نہ کرنے کے باوجود پنجاب اسمبلی وزیراعلیٰ کی ایڈوائس کے 48 گھنٹے مکمل ہونے کے بعد آئینی طور پر از خود تحلیل ہو گئی، پنجاب اسمبلی کی تحلیل سے متعلق اپنے ایک بیان میں گورنر پنجاب نے کہا کہ ایسا کرنے سے آئینی عمل میں کسی قسم کی رکاوٹ کا اندیشہ نہیں ہے کیوں کہ آئین اور قانون میں وضاحت کے ساتھ تمام معاملات کے آگے بڑھنے کا راستہ موجود ہے۔
بتایا گیا ہے کہ نگران وزیر اعلیٰ آنے تک پرویز الہٰی ہی وزیراعلیٰ کے عہدے کو سنبھالیں گے، پنجاب میں نگران سیٹ اپ کیلئے عمران خان نے پرویز الہٰی سے ملاقات کا فیصلہ کیا ہے، عمران خان اور پرویز الہٰی کی زمان پارک میں ملاقات ہوگی، ملاقات میں نگران سیٹ اپ کیلئے ناموں پرمشاورت ہوگی، عمران خان مشاورت کے بعد پرویز الہٰی کو نگران سیٹ اپ کیلئے نام دیں گے۔
واضح رہے کہ چوہدری پرویز الٰہی نے پنجاب اسملبی کی تحلیل کی دستخط شدہ سمری 12 جنوری کو گورنر پنجاب کو بھجوائی تھی، اس سے قبل انہوں نے عدالتی حکم کی روشنی میں پنجاب اسمبلی سے اعتماد کا ووٹ حاصل کیا تھا، اعتماد کے ووٹ کی قرار داد کے حق میں 186 اراکین نے ووٹ دیا تھا تاہم اپوزیشن نے اس عمل کا بائیکاٹ کرتے ہوئے ایوان سے واک آؤٹ کیا۔