فیروز خان نے بھارتی اداکار نواز الدین صدیقی کی حمایت کے بعد تنقید کا سامنا کرنے پر ٹویٹ ڈیلیٹ کردی

کراچی(مسائل نیوز)اہلیہ پر تشدد کے حوالے سے تنازعات کا شکار پاکستانی اداکار فیروز خان نے بھارتی اداکار نواز الدین صدیقی کی حمایت کی ، تاہم ان کی حمایت میں کی گئی ٹوئٹ کچھ ہی دیر بعد انہوں نے ڈیلیٹ کر دی۔

مائیکروبلاگنگ سائٹ ٹوئٹر پر نواز الدین صدیقی نے اپنی اہلیہ کے الزامات پر جواب دیا تو فیروز خان نے بھارتی اداکار کی ٹوئٹ کو ری ٹوئٹ کرتے ہوئے ان کے لئے نیک تمناؤں کا اظہار کیا اور انہیں پسندیدہ اداکار قرار دیا۔فیروز خان نے اس ٹویٹ پر لکھا کہ “میں اپنے پسندیدہ اداکار کو نیک تمنائیں بھیج رہا ہوں”، ساتھ ہی انہوں نے مضبوط رہنے کیلئے بازو والی ایموجی بھی پوسٹ میں شامل کی۔

فیروز خان نے یہ ہی پوسٹ اپنے انسٹاگرام پر بھی شیئر کی، تاہم چند گھنٹوں بعد ہی فیروز خان نے بھارتی اداکار کی حمایت میں کی گئی ٹوئٹ اور انسٹا پوسٹ کو سوشل میڈیا صارفین کی جانب سے شدید تنقید کے بعد ڈیلیٹ کر دیا۔سوشل میڈیا صارفین کی جانب سے فیروز خان کو تنقید کا نشانہ بناتے ہوئے انہیں اپنے مسائل پہلے حل کرنے کی تلقین کی گئی جبکہ کچھ کے مطابق فیروز خان نے توجہ حاصل کرنے کے لئے بھارتی اداکار کی حمایت کی ہے۔

یادر ہے کہ بھارتی اداکار نوازالدین صدیقی کی طرح پاکستانی اداکار فیروز خان کو ابھی اپنی سابقہ اہلیہ علیزے سلطان کی طرف سے گھریلو تشدد کے الزامات کا سامنا ہے۔بھارتی اداکار نے گزشتہ روز سوشل میڈیا پر اپنا موقف پیش کیا جس میں انہوں نے اپنی سابقہ اہلیہ عالیہ کے تمام الزامات کی سختی سے تردید کی ہے۔