ڈیرہ مراد جمالی میں زیرِ تعمیر بے نظیر میڈیکل کالج سے نامعلوم مسلح افراد نے مزدور اغوا کرلیا

سیکیورٹی انتظامات ناقص، پولیس نے مغوی کی بازیابی کے لیے علاقے کی ناکہ بندی کردی
ڈیرہ مراد جمالی(مسائل نیوز)نصیر آباد کے علاقے ڈیرہ مراد جمالی میں زیرِ تعمیر بینظیر بھٹو میڈیکل کالج سے نامعلوم مسلح افراد نے ایک مزدور کو اغوا کرلیا۔ پولیس کے مطابق واقعہ گزشتہ شب نوتال تھانہ کی حدود میں پیش آیا، جہاں مزدور اختیار حسین کام میں مصروف تھا کہ اچانک مسلح افراد نے اسے اسلحے کے زور پر قابو میں لے کر نامعلوم مقام کی جانب منتقل کردیا۔ واقعے کی اطلاع ملتے ہی پولیس موقع پر پہنچ گئی اور علاقے کی ناکہ بندی کرتے ہوئے مغوی کی بازیابی کے لیے کارروائیاں تیز کر دیں۔ پولیس حکام کے مطابق واقعے کی تمام پہلوں سے تحقیقات جاری ہیں۔ مقامی ذرائع کا کہنا ہے کہ زیر تعمیر میڈیکل کالج میں سیکیورٹی انتظامات انتہائی ناقص ہیں، جس کے باعث مزدوروں میں خوف و ہراس کی فضا پیدا ہوگئی ہے۔