Get real time updates directly on you device, subscribe now.
اسلام آباد (مسائل نیوز) پاکستان تحریک انصاف کے چیئرمین سابق وزیراعظم عمران خان نے کہا ہے کہ سیاست کے لبادے میں قابض گروہ آئین وجمہوریت پر حملہ آور ہے، پاکستان کو سیاسی ومعاشی بحران کی دلدل میں دھکیلا دیا گیا، امپورٹڈ سرکار نے عوام کو دبانے کیلئے غیرجانبدار آوازوں کو دبا رہی ہے۔ ہم نیوز کے مطابق چیئرمین پی ٹی آئی عمران خان سے تحریک انصاف شمالی پنجاب کے سوشل میڈیا ذمہ داران نے ملاقات کی۔
جس میں ملکی سیاسی صورتحال سمیت پی ٹی آئی کے بیانیے کے خدوخال سمیت اہم امور پر تبادلہ خیال کیا گیا۔ چیئرمین پی ٹی آئی عمران خان نے کہا کہ سیاست کے لبادے میں قابض گروہ آئین و جمہوریت پر حملہ آور ہے، پاکستان کو بیرونی سازش سے سیاسی و معاشی بحران کی دلدل میں دھکیلا گیا، قوم نے سازش کے ذریعے عوامی مینڈیٹ کی توہین پر شدید ردِعمل دیا، بیرونی سازش کامیاب ہوئی تو عوام کسی تحریک کے بغیر سڑکوں پر نکلی۔
عمران خان نے کہا کہ امپورٹڈ سرکار نے عوام کو دبانے کیلئے بدترین فسطائیت کا سہارا لیا اور میڈیا میں موجود آزاد اور غیرجانبدار آوازوں کو دبا کرجبر کا سکوت طاری کرنے کی کوشش کی۔ مزید برآں چیئرمین پی ٹی آئی عمران خان سے ڈپٹی چیئرمین سینٹ مرزا محمد آفریدی نے ملاقات کی۔ جس میں ملکی مجموعی سیاسی صورتحال اور ایوانِ بالا میں پی ٹی آئی کے کردار اور باہمی دلچسپی کے امور پر تبادلہ خیال کیا گیا۔
عمران خان نے سینیٹر اعظم سواتی کی گرفتاری اور ان پر تشدد کی مذمت کی۔ عمران خان نے کہا کہ امپورٹڈ سرکار آئین و پارلیمان کی حرمت پر حملہ آور ہے، ایوانِ بالا کے 74 سالہ رکن کی گرفتار اور تشدد کرکے آئین وقانون کی دھجیاں اڑائی گئیں، دنیا کا کوئی مہذب ملک محض اظہار رائے پر غیرانسانی سلوک کی اجازت نہیں دیتا، اعظم سواتی کے پروڈکشن آرڈرز جاری نہ کئے جانے کی وجوہات بھی ناقابلِ فہم ہیں، چیئرمین و ڈپٹی چیئرمین سینیٹ ایوان کی حرمت کی بحالی کیلئے اقدامات اٹھائیں۔
