Get real time updates directly on you device, subscribe now.
لاہور (مسائل نیوز) پاکستان تحریک انصاف (پی ٹی آئی) کے 13 اگست کے جلسے کے پیش نظر نیشنل ہاکی سٹیڈیم میں لگی آسٹرو ٹرف اکھاڑنا شروع کر دی گئی ہے۔ سوشل میڈیا پر وائرل ہونے والی ایک ویڈیو میں مزدور کو آسٹروٹرف ہٹاتے ہوئے دیکھا جا سکتا ہے جب کہ 13 اگست کو ہونے والے سیاسی اجتماع کیلئے دیگر تیاریاں زوروں پر تھیں۔
نیشنل ہاکی سٹیڈیم ،لاہور کا آسٹروٹرف ملک میں ہاکی کھلاڑیوں کے لیے بہت کم دیکھ بھال کرنے والے ٹرفز میں سے ایک ہے۔
پہلے سے ہی محروم قومی کھیل اور اس کے بین الاقوامی کھلاڑی ٹرف ہٹانے کے بعد کئی دن تک نقصان اٹھا سکتے ہیں۔ نجی ٹی وی جیو نیوز کے مطابق ڈائریکٹر ایڈمن سپورٹس بورڈ پنجاب سید عمیر حسن کا کہنا ہےکہ ہاکی سٹیڈیم میں جلسے کی اجازت ضلعی انتظامیہ نے دی، سپورٹس بورڈ کا اس میں کوئی عمل دخل نہیں۔
قائم مقام سیکریٹری پاکستان ہاکی فیڈریشن حیدر علی کا کہنا ہے کہ نیشنل ہاکی سٹیڈیم پنجاب سپورٹس بورڈ کی ملکیت ہے، ہاکی میچ کرانے کے لیے بھی سپورٹس بورڈ سے اجازت درکار ہوتی ہے۔
- Advertisement -
ڈائریکٹر نے نئی آسٹروٹرف گراس کی تنصیب کے بارے میں بھی بات کی۔ ان کا کہنا تھا کہ ٹرف کو تبدیل کرنے کی سمری تیار کر لی گئی ہے، آسٹروٹرف کی تبدیلی کی سمری ایک ہفتے کے اندر بھجوائی جائے گی، چند ماہ میں ٹرف درآمد کی جائے گی اور ایک نیا آسٹروٹرف نصب کیا جائے گا۔ خیال رہے کہ تحریک انصاف نے 13 اگست کو پریڈ گراؤنڈ اسلام آباد میں جلسے کا اعلان کیا تھا لیکن بعد میں اس کا مقام تبدیل کردیا گیا تھا۔ اب یہ جلسہ نیشنل ہاکی سٹیڈیم لاہور میں ہوگا۔
