بلوچستان کے قدرتی وسائل کی لوٹ کھسوٹ جاری ہے، بلوچستان کے لوگ اپنی زمین اور وسائل کے تحفظ کے بغیر رہ گئے ہیں: نوابزادہ جمیل اکبر بگٹی

کوئٹہ (مسائل نیوز)شہید نواب اکبرخان بگٹی کے صاحبزادے نوابزادہ جمیل اکبر بگٹی نے سماجی رابطے کی ویب سائٹ ایکس پر بلوچستان کے قدرتی وسائل کے غیر منصفانہ استحصال پر شدید تشویش کا اظہار کیا ہے۔انہوں نے کہا کہ بلوچستان کے لوگ اپنی زمین اور وسائل کے تحفظ کے بغیر رہ گئے ہیں، اور ان کے وسائل کی لوٹ کھسوٹ جاری ہے۔ نوابزادہ جمیل نے کہا کہ بلوچ عوام کی قربانیوں کو نظر انداز کرنا اور ان کے قدرتی وسائل پر قبضہ کرنا ایک تاریخی ظلم ہے، جو ماضی میں امریکی سرخ فام باشندوں کے ساتھ کیے گئے نسل کشی جیسے مظالم کا تسلسل ہے۔انہوں نے مزید کہا کہ بلوچستان کے وسائل کی حفاظت اور استحصال کو روکنے کے لیے فوری اقدامات اٹھانا لازمی ہیں، ورنہ یہ ناانصافی نہ صرف بلوچستان بلکہ پورے خطے کی ترقی کو متاثر کرے گی۔ نوابزادہ جمیل نے حکومت اور متعلقہ اداروں سے مطالبہ کیا کہ بلوچستان کے قدرتی وسائل کے تحفظ کو یقینی بنایا جائے تاکہ بلوچ عوام کی فلاح و بہبود اور خطے کی معاشی ترقی ممکن ہو سکے۔