کراچی کے عوام ہوشیار! آن لائن رائیڈ پر سفر کرنیوالے شہری یہ احتیاط جان لیں

کراچی (مسائل نیوز)کراچی جیسے مصروف شہر میں جہاں عوامی نقل و حمل کا منظم نظام اب تک مکمل طور پر قائم نہیں ہو سکا، وہاں بائیکیا،یانگو اور ان ڈرائیو جیسی ٹیکسی سروسز شہریوں کے لیے ایک بڑی سہولت بن چکی ہیں تاہم ان سہولتوں کے ساتھ ساتھ ذاتی احتیاطی تدابیر اختیار کرنا محفوظ اور پُرسکون سفر کے لیے نہایت ضروری ہے۔

ماہرین کا کہنا ہے کہ اگر شہری ایپ کی خصوصیات کو اپنی ذاتی ہوشیاری کے ساتھ استعمال کریں تو کسی بھی ناخوشگوار واقعے سے بچا جا سکتا ہے۔ ٹیکسی میں بیٹھنے سے پہلے چند بنیادی نکات پر توجہ دینا ضروری ہے۔

سب سے پہلے اپنی سواری کی تصدیق کریں۔ گاڑی میں بیٹھنے سے قبل اس بات کا یقین کریں کہ گاڑی کا نمبر پلیٹ، ماڈل، اور رنگ وہی ہے جو ایپ میں ظاہر ہو رہا ہے۔

ڈرائیور کی تصویر اور نام چیک کریں اور مؤدبانہ انداز میں پوچھیں کہ وہ کس کو لینے آیا ہے۔ اس طرح غلط یا مشکوک ڈرائیور سے بچاؤ ممکن ہے۔

سفر کے دوران ہمیشہ پچھلی نشست پر بیٹھیں، خاص طور پر اگر اکیلے سفر کر رہے ہوں۔ اس سے نہ صرف ذاتی فاصلہ برقرار رہتا ہے بلکہ ہنگامی صورتحال میں دونوں طرف سے گاڑی سے اترنا بھی آسان ہوتا ہے۔

ایپ میں موجود شیئر ٹرِپ فیچر کے ذریعے اپنی سواری کی تفصیلات کسی قریبی دوست یا گھر کے فرد کو بھیجیں۔ اس طرح آپ کا مقام، ڈرائیور کی معلومات اور راستے کی نگرانی بآسانی ممکن رہتی ہے۔ فون ہمیشہ چارج رکھیں اور راستے کی تصدیق کسی علیحدہ نقشہ ایپ کے ذریعے کرتے رہیں۔

اگر کسی بھی مرحلے پر ڈرائیور راستہ تبدیل کرے یا آپ کو کوئی غیر معمولی احساس ہو تو فوراً کسی روشن، پُرہجوم مقام پر گاڑی رکوائیں اور سفر ختم کر دیں۔

سفر مکمل ہونے کے بعد سواری کی درجہ بندی (ریٹنگ) ضرور کریں اور کسی بھی غیر ذمہ دارانہ یا مشکوک رویے کی اطلاع فوری طور پر ایپ کی حفاظتی شکایات والے حصے میں درج کریں۔

آپ کی یہ چھوٹی سی احتیاط اور فیڈبیک کراچی کے دیگر مسافروں کے لیے ایک محفوظ ماحول قائم کرنے میں مددگار ثابت ہو سکتی ہے۔