اداروں کے خلاف بغاوت پر اکسانے کا کیس، شہباز گل کی درخواستِ ضمانت پر فیصلہ سنا دیا گیا

اسلام آباد(مسائل نیوز)پاکستان تحریک انصاف کے رہنما ڈاکٹر شہباز گل کی درخواستِ ضمانت مسترد کر دی گئی۔سیشن کورٹ نے شہباز گل کی درخواستِ ضمانت خارج کر دی۔گذشتہ روز ہونے والی سماعت میں شہباز گِل کے وکیل نے کہا تھا کہ شہباز گِل معافی مانگنے کے لیے تیار ہیں۔ مقامی عدالت میں شہبازگل کی درخواست ضمانت پرسماعت ہوئی جس دوران کمرہ عدالت میں شہبازگل کے بیان اور اینکر کے سوال سے متعلق ویڈیو چلائی گئی۔
ملزم شہبازگل کے وکیل نے مقدمے کا متن پڑھنا شروع کیا اور بتایا کہ 8 اگست کو غلام مرتضیٰ چانڈیو کی مدعیت میں مقدمہ درج ہوتا ہے، ملزم پر فورسز کے افسران واہلکاروں کو تقسیم کرنے کا الزام لگایا گیا، مدعی سٹی مجسٹریٹ نے شہبازگل پر بغاوت کا الزام لگایا ہے جب کہ مقدمے کے بعد بیان میں مزید 5 ملزمان کو نامزد کیا گیا۔
ملزم کے وکیل برہان معظم نیشہبازگل کا بیان نہ دکھانے پر اعتراض کرتے ہوئے عدالت کو بتایا کہ پولیس ملزم کا بیان نہیں دکھا رہی باقی سارے بیانات دکھا دیے، پولیس نے 161 کا بیان نہیں دکھایا، 12 گواہان لکھے ہوئے ہیں لہٰذا عدالت 161 کے بیان دکھانے کا حکم دے۔

اس پرعدالت نے پولیس کو ملزم کا پہلا بیان دکھانے کا حکم دیا اور جج نے تفتیشی افسرکو ہدایت جاری کرتے ہوئیکہا کہ آپ وکلا کو 161 کا بیان دکھائیں کس نے کیا بیان دیا۔ملزم کے وکیل نے کہا کہ شہبازگل نے بغاوت کے متعلق کبھی سوچا ہی نہیں، ٹرانسکرپٹ کی مختلف جگہوں سے پوائنٹس اٹھاکرمقدمہ درج کیاگیا، اس سارے بیان پرکسی جگہ پرغلطی فہمی ہوئی ہے، شہبازگل اس غلط فہمی کو دور کرنے پر تیارہیں،وہ معافی مانگنے پربھی تیار ہیں لیکن یہ حق کیسے ملاکہ مختلف پوائنٹ اٹھاکربغاوت کا الزام لگادیاجائے۔بعد ازاں عدالت نے کیس کی مزید سماعت منگل تک کے لیے ملتوی کردی۔