شہید حسین علی یوسفی نے ہمیشہ بلوچستان میں آباد برادر اقوام میں اتحاد و اتفاق اور بھائی چارے کو فروغ دینے میں اپنا کلیدی کردار ادا کیا،کاشف حیدری

کوئٹہ (مسائل نیوز) نیشنل پارٹی ہزارہ ٹاؤن کے رہنما کاشف حیدری نے اپنے ایک بیان میں مدبر سیاستدان اور سماجی رہنما حسین علی یوسفی کی چودھویں برسی پر بلوچستان کے عوام خصوصا ہزارہ قوم سے تعزیت کرتے ہوئے کہا ہے کہ شہید حسین علی یوسفی کی خدمات ناقابل فراموش ہیں، ساری زندگی اپنے صوبے بلخصوص قوم کی خدمت میں گزاری اور شہید حسین علی یوسفی بلوچستان کا ایک چمکتا ہوا ستارہ تھا۔ انہوں نے کہا کہ شہید حسین علی یوسفی نے ہمیشہ بلوچستان میں آباد برادر اقوام میں اتحاد و اتفاق اور بھائی چارے کو فروغ دینے میں اپنا کلیدی کردار ادا کیا۔ انہوں نے معاشرے میں نمود و نمائش کی ہمیشہ مخالفت کی۔ شہید حسین علی یوسفی ایک سچا، ملنسار، ہر قسم کی کرپشن سے پاک، صحیح معنوں میں ایک نظریاتی سیاست دان تھے۔ وہ پارلیمانی اور سیٹ کی سیاست سے زیادہ عوامی سیاست کے پرچارک تھے۔ آج جبکہ ان کے نظریاتی سیاست کو بھلایا جارہا ہے تو اس کی نظریے کی پیروی کرنے کی اشد ضرورت ہے۔ انہوں نے شہید یوسفی کی سیاسی اور سماجی خدمات کو زبردست خراج تحسین پیش کیا۔