Get real time updates directly on you device, subscribe now.
اسلام آباد (مسائل نیوز) چئیرمین پی ٹی آئی عمران خان نے آرمی چیف کی تعیناتی کے حوالے سے پی ٹی آئی رہنماؤں کو تبصرے سے گریز کی ہدایت کر دی۔جنگ اخبار کی رپورٹ کے مطابق پی ٹی آئی نے اس حوالے سے ایک طے شدہ حکمت عملی کے تحت اپنے رہنماؤں کو کسی قسم کا تبصرہ، بیان یا اس موضوع پر میڈیا سے گفتگو کرنے اور پارٹی کا موقف دینے سے سختی سے منع کر دیا۔
عمران خان کی جانب سے تمام پارٹی رہنماؤں اور متعلقہ عہدیداروں کو واضح طور پر ہدایات جاری کر دی گئیں ہیں۔رپورٹ کے مطابق یہ ہدایات گذشتہ روز عمران خان کی سربراہی میں ہونے والے رہنماؤں کے ااجلاس میں دی جانے والی ہدایات کے حوالے سے ایک فیصلہ تھا۔ دوسری جانب آئی ایس پی آر نے بھی آرمی چیف کی تعیناتی کی سمری وزارت دفاع کو بھیجنے کی تصدیق کی ،سمری میں 6 سینئر ترین لیفٹیننٹ جنرلز کے نام شامل ہیں۔
سمری میں شامل ناموں میں سے چیف آف آرمی سٹاف اور چیئرمین جوائنٹ چیفس آف سٹاف کمیٹی منتخب کیے جائیں گے۔ ڈی جی آئی ایس پی آر نے ٹویٹر پر بتایا کہ جی ایچ کیو نے چیف آف آرمی سٹاف اور چیئرمین جوائنٹ چیفس آف سٹاف کمیٹی کی تعیناتی کیلئے سمری وزارت دفاع کو بھیج دی۔ سمری میں سب سے پہلا نام لیفٹیننٹ جنرل عاصم منیر کا ہے جبکہ دوسرا لیفٹیننٹ جنرل ساحر شمشاد کا ہے۔
سمری میں لیفٹیننٹ جنرل اظہر عباس، لیفٹیننٹ جنرل نعمان محمود، لیفٹیننٹ جنرل فیض حمید اور لیفٹیننٹ جنرل محمد عامر کا نام شامل ہے۔ جبکہ وزیردفاع خواجہ آصف نے اپنے ایک بیان میں کہا کہ اگلے 48 گھنٹوں میں آرمی چیف کی تعیناتی کا کام شروع ہوجائے گا،وزارت دفاع کے پاس کل سینئر افسران کے نام آجائیں گے۔ ہم سینئر فوجی افسران کے ناموں کی سمری وزیراعظم کے حوالے کردیں گے اور وہ فیصلہ کرلیں گے۔سینئر فوجی افسران کا نام بھیجنے کا استحقاق جی ایچ کیو ہے،سول ملٹری تعلقات میں کوئی تناؤ نہیں ہے،آرمی چیف جنرل قمر جاوید باجوہ نواز شریف کا بڑا حترام کرتے ہیں۔اسی طرح وزیرداخلہ رانا ثناءاللہ نے کہا کہ نئے آرمی چیف کی تقرری کا عمل شروع کر دیا گیا ہے۔
