Get real time updates directly on you device, subscribe now.
لاہور (مسائل نیوز) تحریک انصاف نے دعوٰیٰ کیا کہ انکے 186 نمبرز پورے ہیں،186 ارکان کو اسمبلی کمیٹی روم میں پہنچا دیا گیا ۔ اپوزیشن لیڈر پنجاب اسمبلی سبطین خان نے دعویٰ کرتے ہوئے کہا کہ ہمارے 186 ارکان پنجاب اسمبلی میں موجود ہیں ۔ واضح رہے کہ تحریک انصاف اور ہم خیال جماعت مسلم لیگ ق کے ارکان اسمبلی بسوں میں سوار ہوکر پنجاب اسمبلی پہنچے تھے ۔
خیال رہے کہ اس سے پہلے وزیر اعلٰی پنجاب کیلئے نامزد امیدوار چوہدری پرویز الٰہی پنجاب اسمبلی پہنچے تو صحافی نے سوال داغ دیا اور چوہدری پرویز الٰہی سے پوچھا کہ رانا ثناء اللہ کہہ رہے ہیں کہ 50 ارکان ووٹ نہیں دیں گے۔ چوہدری پرویز الٰہی نے برجستہ جواب دیتے ہوئے کہا کہ ساری زندگی جس نے سچ نہیں بولا،اسکا ذکر نہ کریں، جبکہ آصف زرداری کا مشن بالکل ناکام ہو گیا ۔
پرویز الٰہی کا کہنا تھا کہ اب زیادہ دیر نہیں لگے گی 4 بجے تک سب کو پتہ چل جائے گا،ساری رات سب نے دعائیں کی ہیں کہ نمبرز میں اضافہ ہوجائے ۔ ایک سوال کے جواب میں انکا کہنا تھا کہ میں تو گھر سے آ رہا ہوں جو فیصلے کل ہوئے وہیں آج ہوں گے۔ واضح رہے کہ اس سے قبل چوہدری پرویز الہیٰ نے کہا کہ تمام اقدامات آئین اور قانون کے مطابق ہوں گے۔ ساتھی وزیراعلیٰ کے انتخاب کے لیے دعا کریں،ساری رات سب نے دعائیں کی ہیں کہ نمبرز میں اضافہ ہوجائے،سپریم کورٹ کے حکم کے تحت پنجاب کے نئے وزیراعلیٰ کا انتخاب آج ہوگا جہاں ضمنی الیکشن میں کامیابی کے بعد تحریک انصاف کے ارکان کی تعداد 178 ہوگئی ہے جب کہ اس کے اتحادی مسلم لیگ ق کے پاس 10 ارکان ہیں ، دونوں جماعتوں کے مجموعی طور پر 188 ارکان ہیں۔
4 نشستیں جیتنے کے بعد مسلم لیگ (ن) کے ارکان کی تعداد 168 ہوگئی اور اس کے اتحایوں میں پیپلز پارٹی کے 7 ارکان، ایک رکن راہِ حق پارٹی اور تین آزاد ارکان شامل ہیں، یوں حمزہ شہباز کو 179 ارکان کی حمایت حاصل ہے۔
