ترین گروپ کو مرکز میں اہم ذمہ داری دینے کا فیصلہ

اسلام آباد(مسائل نیوز)ترین گروپ کو مرکز میں اہم ذمہ داری دینے کا فیصلہ کیا گیا ہے۔میڈیا رپورٹس کے مطابق ترین گروپ کے عون چوہدری کو وزیراعظم کا مشیر بنانے کا فیصلہ کر لیا گیا۔عون چوہدری کو وزیراعظم شہباز شریف کا مشیر بنانے کی سمری کابینہ ڈویژن نے تیار کر لی۔عون چوہدری کو وزیراعظم کا مشیر تعینات کرنے کا نوٹیفیکیشن آج جاری کیا جائے گا۔
خیال رہے کہ فاقی کابینہ کی حلف برداری کی تقریب آج گیارہ بجے ایوان صدر میں ہوگی جہاں چیئرمین سینیٹ وزراء سے حلف لیں گے۔ بتایا گیا ہے کہ کابینہ میں ن لیگ ، پیپلزپارٹی ، جے یو آئی اور ایم کیوایم کے وزرا کو شامل کیا گیا ہے ، دیگراتحادی جماعتوں سےتعلق رکھنے والے وزرا بھی اپنے عہدے کا حلف اٹھائیں گے ، نئی وفاقی کابینہ 36 رکنی ہوگی جس میں پیپلزپارٹی کے 11 ، ن لیگ کے 14 اور جے یو آئی کے 4 وزرا حلف اٹھائیں گے جب کہ 7 وزارتیں دیگر اتحادی جماعتوں کو دی جائیں گی ، تقریب حلف برداری کے بعد وفاقی وزرا کے محکموں کا نوٹی فیکیشن جاری کیا جائے گا۔

معلوم ہوا ہے کہ مسلم لیگ ن کی طرف سے خواجہ آصف، احسن اقبال، رانا ثناءاللہ، ایاز صادق، رانا تنویر، خرم دستگیر، سعد رفیق، جاوید لطیف، ریاض پیرزادہ، مرتضیٰ جاوید عباسی اور اعظم نذیر تارڑ کابینہ کا حصہ ہیں ، پیپلز پارٹی کے خورشید شاہ، نوید قمر اور شیری رحمان، قادر پٹیل، شازیہ مری، مرتضیٰ محمود، ساجد حسین ، احسان الرحمان اور عابد حسین کابینہ کا حصہ ہوں گے۔
اسی طرح جمعیت علمائے اسلام ف کے اسعد محمود، عبدالواسع، مفتی عبدالشکور اور سینیٹر طلحہ محمود کابینہ میں شامل ہوں گے ، متحدہ قومی موومنٹ پاکستان کے امین الحق اور فیصل سبزواری بھی کابینہ کا حصہ ہیں ، بلوچستان عوامی پارٹی کے اسرار ترین، جمہوری وطن پارٹی کے شاہ زین بگٹی کابینہ کا حصہ ہیں جب کہ پاکستان مسلم لیگ ن کی عائشہ غوث پاشا اور عبدالرحمان وزیر مملکت ہوں گے اسی طرح پیپلز پارٹی کی حنا ربانی کھر، مصطفی نواز کھوکھر بھی وزیر مملکت ہوں گے جبکہ پیپلز پارٹی کے سینئر رہنماء قمر زمان کائرہ مشیر برائے وزیراعظم ہوں گے۔