Get real time updates directly on you device, subscribe now.
اسلام آباد(مسائل نیوز)پاکستان تحریکِ انصاف (پی ٹی آئی) نے قومی اسمبلی میں اپوزیشن لیڈر کے تقرر سے متعلق پارٹی کے اندر اختلافات کی خبروں کو بے بنیاد اور گمراہ کن قرار دے دیا ہے۔
پی ٹی آئی کے رہنما اور رکن قومی اسمبلی عامر ڈوگر نے واضح کیا ہے کہ اپوزیشن لیڈر کے معاملے پر پارٹی میں کسی قسم کا اختلاف موجود نہیں اور جان بوجھ کر کنفیوژن پھیلائی جا رہی ہے۔
عامر ڈوگر نے صحافیوں کے سوالات کا جواب دیتے ہوئے کہا کہ 76 اراکینِ قومی اسمبلی نے متفقہ طور پر محمود خان اچکزئی کے نام کی ریکوزیشن اسپیکر قومی اسمبلی کو جمع کرا دی ہے، جسے تمام اراکین من وعن تسلیم کرتے ہیں۔
واضح رہے کہ عامر ڈوگر نے ایک روز قبل اسپیکر قومی اسمبلی سے ملاقات کی تھی اور اپوزیشن لیڈر کے فوری تقرر کا مطالبہ کیا تھا، جبکہ اسپیکر کا مؤقف ہے کہ اپوزیشن کے اپنے ہی ارکان محمود خان اچکزئی کے نام پر اختلاف رکھتے ہیں۔
اس ضمن میں بیرسٹر عقیل ملک کی جانب سے بھی یہ دعویٰ سامنے آیا تھا کہ پی ٹی آئی کے کچھ ارکان چاہتے ہیں کہ اپوزیشن لیڈر کے عہدے پر انہیں کیوں نہیں نامزد کیا گیا۔
- Advertisement -
اس پر ردِعمل دیتے ہوئے عامر ڈوگر نے کہا کہ ان دعوؤں میں کوئی حقیقت نہیں، انہوں نے واضح کیا کہ جن 76 اراکین نے دستخط کر کے محمود خان اچکزئی کو بطور اپوزیشن لیڈر نامزد کیا ہے۔
’وہ سب یہ فیصلہ چیئرمین پی ٹی آئی عمران خان کی ہدایت پر کر چکے ہیں اور پارٹی میں کوئی ایک بھی رکن ایسا نہیں جو اس فیصلے کی مخالفت کرتا ہو۔‘
عامر ڈوگر کا کہنا تھا کہ اپوزیشن کے اندر اختلافات کی خبریں دراصل جان بوجھ کر پھیلائی جا رہی ہیں تاکہ اپوزیشن لیڈر کے تقرر میں تاخیر کی جا سکے۔
انہوں نے الزام عائد کیا کہ اگر اسپیکر کے سامنے یہ مطالبہ دوبارہ بھی دہرایا جاتا ہے اور پھر بھی تقرری نہیں ہوتی، تو اس کا مطلب یہ ہوگا کہ حکومت خود اس تقرر میں رکاوٹ ڈال رہی ہے، اسی لیے ایسی خبریں سامنے لائی جا رہی ہیں۔
انہوں نے کہا کہ پی ٹی آئی کل ایک بار پھر اسپیکر قومی اسمبلی کے سامنے اپوزیشن لیڈر کے تقرر کا مطالبہ دہرائے گی۔
