Get real time updates directly on you device, subscribe now.
اسلام آباد (مسائل نیوز) وزیراعظم شہباز شریف نے عندیہ دیا ہے کہ اگلے عام انتخابات 15 ماہ بعد اگست یا ستمبر 2023 میں اپنے مقررہ وقت پر ہوں گے۔انہوں نے ترک نشریاتی ادارے کو انٹرویو دیتے ہوئے کہا کہ ملک میں آئینی و قانونی طریقے سے حکومت کی تبدیلی عمل میں لائی گئی، اگلے عام انتخابات اپنے مقررہ وقت پر ہی ہوں گے۔وزیراعظم نے کہا کہ اتحادیوں سے مشاورت کے بعد فیصلہ کیا گیا کہ مشکل حالات اور چیلنجز کا سامنا کرتے ہوئے ان کے حل کے لیے وسائل پیدا کیے جائیں گے۔
دوست ممالک کی مدد حاصل کی جائے گی اور ملک میں تعمیر نو کی جائے گی تاکہ غربت میں کمی لائی جا سکے۔پٹرولیم مصنوعات کی قیمتوں میں ایک بار پھر 30 روپے فی لیٹر اضافے کی وجہ بتاتے ہوئے وزیراعظم نے کہا کہ ملک میں تیل و گیس کی قیمتیں بڑھائی گئی ہیں کیونکہ عالمی سطح پر یہ مہنگی ہوئی ہیں۔
خیال رہے کہ وزیرِ اعظم شہباز شریف ترکی کا تین روزہ سرکاری دورہ مکمل کرکے وفد کے ہمراہ وطن واپس روانہ ہو گئے۔
- Advertisement -
جمعرات کو ایسن بوعا ایئر پورٹ پر ترکی کے وزیرِ تجارت ڈاکٹر مہمت موش نے وزیرِاعظم محمد شہباز شریف اور پاکستانی وفد کو الوداع کیا۔وزیراعظم محمد شہباز شریف نے 31 مئی سے 2 جون تک ترکی کا تین روزہ سرکاری دورہ کیا۔ وزارت عظمی کا منصب سنبھالنے کے بعد وزیراعظم شہبازشریف کا ترکی کا یہ پہلا دورہ تھا۔ وزیراعظم شہبازشریف نے دورہ کے دوران صدر رجب طیب اردوان سے وًن آن وًن ملاقات کی جبکہ دونوں ممالک کے درمیان وفود کی سطح پر بات چیت بھی ہوئی۔
صدر اردوان نے وزیراعظم شہباز شریف کے اعزاز میں عشائیہ بھی دیا۔ دونوں رہنمائوں نے دونوں ممالک کے درمیان مفاہمت کی 6 یادداشتوں پر دستخط کی تقریب میں شرکت کی۔ دونوں ممالک کے درمیان سفارتی تعلقات کے 75 سال مکمل ہونے پر مشترکہ لوگو جاری کیا گیا۔دونوں ممالک نے یہ سالگرہ شایان شان طریقے سیمنانے کے عزم کا اظہار کیا۔ وزیراعظم شہباز شریف نے ان کا اور ان کے وفد کا پرتپاک استقبال اور شاندار میزبانی پر ترک صدر کا شکریہ ادا کیا۔
وزیراعظم نے صدر طیب اردوان کو دورہ پاکستان کی دعوت بھی دی۔دورہ کے دوران وزیراعظم نے ترکی کی ممتاز کاروباری اور مختلف شعبہ جات میں سرمایہ کاری میں دلچسپی رکھنے والی شخصیات سے بھی ملاقاتیں کیں۔ وزیراعظم نے پاکستان ترکی بزنس کونسل فورم سے بھی خطاب کیا اور پاکستان میں سرمایہ کاری کے مواقع کو اجاگر کیا۔۔ وزیراعظم نے جدید ترکی کے بانی مصطفی کمال اتاترک کے مزار پر بھی حاضری اور پھولوں کی چادر چڑھائی۔ وزیراعظم نے ترک وزیر خارجہ ، وزیر صحت اور وزیر تجارت سے بھی ملاقاتیں کیں۔
