جرمنی میں مقیم پاکستانیوں کے لیے بڑی خوشخبری، دونوں ملکوں کے درمیان اہم معاہدہ طے پاگیا

اسلام آباد (مسائل نیوز )پاکستان اور جرمنی کے درمیان دوہری شہریت سے متعلق ایک اہم اور تاریخی پیش رفت سامنے آئی ہے۔

جرمنی میں قائم پاکستانی سفارت خانے نے اعلان کیا ہے کہ دونوں ممالک کے درمیان دوہری شہریت کے حوالے سے تمام قانونی، آئینی اور ضابطہ جاتی تقاضے مکمل کر لیے گئے ہیں، جس کے بعد جرمنی کو باضابطہ طور پر ان ممالک کی فہرست میں شامل کر لیا گیا ہے جن کے ساتھ پاکستان دوہری شہریت کی اجازت دیتا ہے۔

برلن میں واقع پاکستانی سفارت خانہ کی جانب سے جاری کردہ سرکاری عوامی نوٹس کے مطابق اب جرمنی میں مقیم پاکستانی نژاد افراد جرمن شہریت حاصل کرنے کی صورت میں اپنی پاکستانی شہریت برقرار رکھ سکیں گے۔ اس سے قبل جرمن شہریت کے حصول کے لیے پاکستانی شہریت ترک کرنا لازمی شرط تھی۔

سفارتی ذرائع کے مطابق یہ فیصلہ جرمنی میں آباد پاکستانی کمیونٹی کے دیرینہ مطالبے کی تکمیل ہے، جس سے ہزاروں پاکستانی تارکینِ وطن کو قانونی تحفظ اور عملی سہولت حاصل ہوگی۔ ماہرین کا کہنا ہے کہ اس اقدام سے پاکستان اور جرمنی کے درمیان سماجی، معاشی اور سرمایہ کاری کے روابط مزید مضبوط ہوں گے۔

اعلامیے میں مزید بتایا گیا ہے کہ وہ پاکستانی نژاد افراد جنہوں نے ماضی میں جرمن شہریت حاصل کرنے کے لیے اپنی پاکستانی شہریت ترک کی تھی، ان کے لیے پاکستانی شہریت کی بحالی (ری ایکوزیشن) سے متعلق طریقۂ کار، شرائط اور مطلوبہ دستاویزات کی تفصیلات جلد الگ سے جاری کی جائیں گی۔ اس حوالے سے متعلقہ اداروں سے مشاورت کا عمل جاری ہے۔

دوہری شہریت کی اجازت کے بعد جرمنی میں مقیم پاکستانی شہریوں کو روزگار، کاروبار، تعلیم اور سفری سہولیات میں نمایاں آسانی حاصل ہوگی، جبکہ پاکستان میں جائیداد، بینکاری، سرمایہ کاری اور خاندانی معاملات میں بھی انہیں بہتر قانونی سہولت میسر آئے گی۔