ملک کو بحرانوں سے نکالنے کیلئے تمام سیاسی قوتوں کو اعتماد میں لینا ہوگا: ڈاکٹر عبدالمالک بلوچ

تربت (مسائل نیوز)نیشنل پارٹی کے سربراہ اور سابق وزیر اعلیٰ بلوچستان، ڈاکٹر عبدالمالک بلوچ نے ملک کو درپیش سنگین سیاسی، معاشی اور سماجی بحرانوں سے نکالنے کے لیے تمام سیاسی قوتوں پر مشتمل ایک “گرینڈ نیشنل ڈائیلاگ” کو ناگزیر قرار دیا ہے۔ تربت میں پارٹی کے ایک اہم اجلاس سے خطاب کرتے ہوئے انہوں نے کہا کہ کوئی بھی ایک جماعت تنہا ملک کو مسائل کی اس دلدل سے نہیں نکال سکتی، اور جب تک تمام اسٹیک ہولڈرز کو اعتماد میں نہیں لیا جاتا، بحران مزید گہرے ہوتے جائیں گے۔

ڈاکٹر عبدالمالک بلوچ نے موجودہ سیاسی عدم استحکام کو غلط پالیسیوں اور بے جا مداخلت کا نتیجہ قرار دیتے ہوئے کہا کہ ملک اس وقت شدید پولرائزیشن کا شکار ہے جبکہ مہنگائی اور بے روزگاری نے عوام کا جینا محال کردیا ہے۔ انہوں نے کہا کہ ملک کی بقاء اسی میں ہے کہ تمام جمہوری، قوم پرست اور سیاسی قوتیں ذاتی مفادات سے بالاتر ہوکر ایک میز پر بیٹھیں اور ملک کو بحران سے نکالنے کے لیے ایک متفقہ قومی ایجنڈا ترتیب دیں۔

بلوچستان کے حوالے سے بات کرتے ہوئے سابق وزیر اعلیٰ نے کہا کہ لاپتہ افراد کا معاملہ ہو یا وسائل کی منصفانہ تقسیم، ان مسائل کا حل طاقت کے استعمال میں نہیں بلکہ سیاسی مذاکرات میں ہے۔ انہوں نے کہا کہ نیشنل پارٹی ہمیشہ سے پارلیمنٹ کی بالادستی، آئین کی حکمرانی اور اٹھارویں ترمیم پر اس کی روح کے مطابق عملدرآمد کی حامی رہی ہے۔ انہوں نے تمام محب وطن قوتوں سے اپیل کی کہ وہ ملک کو مزید تباہی سے بچانے کے لیے متحد ہوجائیں اور ایک مشترکہ جدوجہد کا آغاز کریں۔