چئیرمین پی ٹی آئی عمران خان نے بنی گالا میں پارٹی رہنماؤں کا اجلاس طلب کر لیا

اسلام آباد (مسائل نیوز) سپریم کورٹ میں ڈپٹی اسپیکر پنجاب اسمبلی کی رولنگ کے خلاف سماعت جاری ہے۔چئیرمین پی ٹی آئی عمران خان نے بنی گالا میں اہم رہنماؤں کا اجلاس طلب کر لیا۔میڈیا رپورٹس کے مطابق ملک جاری سیاسی صورتحال اور ڈپٹی اسپیکر کی رولنگ کے خلاف سپریم کورٹ میں جاری سماعت کے بعد عمران خان نے بھی اہم رہنماؤں کا اجلاس طلب کر لیا ہے۔
قانونی اور آئینی ماہرین کو بھی اجلاس میں طلب کیا گیا ہے۔اجلاس عدالتی کارروائی کے بعد بنی گالا میں ہوگا۔اجلاس میں موجودہ سیاسی صورتحال اور سپریم کورٹ میں سماعت پر مشاورت ہو گی۔اجلاس میں آئندہ کی سیاسی حکمت عملی پر بھی غور ہو گا۔اجلاس میں پاکستان تحریک انصاف کے رہنما شریک ہوں گے۔دوسری جانب صوبہ پنجاب کے نئے وزیراعلیٰ کے معاملے پر پی ٹی آئی کے 3 ناراض دھڑوں نے سر جوڑ لیے ، باہمی مشاورت کے لیے علیم خان گروپ ، ترین گروپ اور چھینہ گروپ کے رہنماؤں کے آپس میں رابطے ہوئے جب کہ جہانگیر ترین تحریک انصاف کے منحرف دھڑوں کو متحد کرنے کے لیے متحرک ہوگئے ہیں۔
میڈیا رپورٹس کے مطابق تحریک انصاف کے ناراض دھڑوں کے درمیان باہمی رابطے شروع ہو چکے ہیں ، علیم خان گروپ، ترین گروپ اور چھینہ گروپ کے رہنماؤں کے آپس میں رابطے ہوئے ہیں جس میں تینوں دھڑوں کے سینئر رہنماؤں نے غیر رسمی مشاورت کی ہے جب کہ پاکستان تحریک انصاف کے منحرف دھڑوں کو اکٹھا کرنے کے لیے 3 رکنی کمیٹی تشکیل دی گئی ہے ، اس کمیٹی میں ترین گروپ کی نمائندگی عون چوہدری کریں گے ، کمیٹی تینوں دھڑوں کو متحد کرنے اور مشترکہ لائحہ عمل پر غور کرے گی ، اس حوالے سے جہانگیر ترین کے مختلف رہنماؤں سے ٹیلی فونک رابطے بھی ہوئے ہیں اور انہوں نے ناراض دھڑوں کا مشترکہ پاور گروپ بنانے پر کام شروع کر دیا ہے۔