Get real time updates directly on you device, subscribe now.
آسٹریلیا(مسائل نیوز)آسٹریلوی کرکٹر ہر جس سنگھ نے کلب کرکٹ میں تاریخی کارکردگی دکھاتے ہوئے صرف 141 گیندوں پر 314 رنز کی ناقابلِ یقین اننگز کھیلی۔ یہ کارنامہ انہوں نے ویسٹرن سبربز کی جانب سے سڈنی کرکٹ کلب کے خلاف پریٹن پارک میں 50 اوورز کے گریڈ میچ میں انجام دیا۔
ان کی طوفانی اننگز میں 35 چھکے اور 14 چوکے شامل تھے، جس نے آسٹریلوی فرسٹ گریڈ پریمیئر کرکٹ میں کسی بھی کھلاڑی کا سب سے بڑا محدود اوورز اسکور بنا دیا۔ یہ سڈنی کی فرسٹ گریڈ کرکٹ کی تاریخ میں تیسرا سب سے بڑا انفرادی اسکور بھی ہے۔
ہر جس سنگھ نے سابق آسٹریلوی کپتان باب سمپسن کا ویسٹرن سبربز کا 229 رنز کا ریکارڈ توڑ دیا اور اب وہ وکٹر ٹرمپَر اور فل جاکس جیسے عظیم کھلاڑیوں کی صف میں شامل ہو گئے ہیں۔
- Advertisement -
نمبر 3 پر بیٹنگ کرتے ہوئے ہر جس نے ابتدا میں تھوڑا وقت لیا مگر پھر دھواں دھار بیٹنگ شروع کردی۔ انہوں نے اپنی سنچری 74 گیندوں پر مکمل کی اور اگلے 67 گیندوں پر مزید 214 رنز جوڑ ڈالے۔
ہر جس سنگھ نے کہا: “یہ میری زندگی کی بہترین شاٹ پلیسنگ اور پاور ہٹنگ تھی۔” تماشائی حیران رہ گئے جب ان کے چھکے ایک کے بعد ایک باؤنڈری کے پار جاتے رہے۔
اس سال کے آغاز میں آسٹریلیا کی انڈر 19 ورلڈ کپ جیتنے والی ٹیم کا حصہ رہنے کے باوجود، 20 سالہ سنگھ کو تاحال نیو ساوتھ ویلز کی جانب سے کوئی معاہدہ نہیں ملا مگر یہ اننگز اُن کے لیے حالات بدل سکتی ہے۔
ویسٹرن سبربز نے 5 وکٹوں کے نقصان پر 483 رنز بنائے اور 196 رنز سے فتح حاصل کی۔ قابلِ ذکر بات یہ ہے کہ باقی کسی بھی بیٹر کا اسکور 37 رنز سے زیادہ نہ تھا، جو ہر جس سنگھ کی شاندار برتری کو ظاہر کرتا ہے۔
