Get real time updates directly on you device, subscribe now.
دبئی (مسائل نیوز)بگ بیش لیگ میں پاکستان کے معروف بلے باز بابر اعظم کی کارکردگی تاحال توقعات کے مطابق نہیں آ سکی۔ شائقین کو ایک بار پھر اس وقت مایوسی کا سامنا کرنا پڑا جب بابر اعظم اپنے دوسرے میچ میں بھی خاطر خواہ اسکور بنانے میں ناکام رہے اور جلد آؤٹ ہو گئے۔
میچ کے دوران بابر اعظم صرف 9 گیندیں کھیل سکے اور 9 رنز بنا کر اپنی وکٹ گنوا بیٹھے۔ انگلش فاسٹ باؤلر لوک ووڈ نے نپی تلی اور جارحانہ گیند بازی کرتے ہوئے بابر کو کھل کر کھیلنے کا موقع نہ دیا اور انہیں پویلین واپس بھیج دیا۔
بابر اعظم کے آؤٹ ہونے کے بعد ٹیم کی بیٹنگ لائن دباؤ کا شکار ہو گئی اور رنز بنانے میں مشکلات پیش آئیں۔ ایک اہم موقع پر تجربہ کار بلے باز کا جلد آؤٹ ہونا ٹیم کے لیے نقصان دہ ثابت ہوا۔
اس کارکردگی پر سوشل میڈیا پر شائقین کرکٹ کی جانب سے مختلف آراء سامنے آئیں۔ کچھ مداحوں نے بابر اعظم کی فارم پر تشویش ظاہر کی جبکہ بعض صارفین نے ان پر تنقید بھی کی۔
کرکٹ مبصرین کے مطابق بابر اعظم کی حالیہ فارم سوالیہ نشان بنی ہوئی ہے تاہم شائقین اب بھی پُرامید ہیں کہ وہ آنے والے میچز میں اپنی صلاحیتوں کا بھرپور مظاہرہ کرتے ہوئے ٹیم کے لیے اہم کردار ادا کریں گے۔
- Advertisement -
اس سے قبل بابر اعظم بگ بیش لیگ 2025-26 میں اپنے ڈیبیو میچ میں بھی متاثر کن کارکردگی دکھانے میں ناکام رہے تھے، جس کے بعد انہیں خاصی تنقید کا سامنا کرنا پڑا۔ سڈنی سکسرز کی نمائندگی کرتے ہوئے بابر پہلی مرتبہ بی بی ایل کا حصہ بنے، تاہم بارش سے متاثرہ میچ میں ان کا آغاز مایوس کن ثابت ہوا۔
پرتھ اسکورچرز کے خلاف پرتھ اسٹیڈیم میں کھیلے گئے 11 اوورز کے مختصر میچ میں بابر اعظم صرف 5 گیندوں پر 2 رنز بنا کر آؤٹ ہو گئے۔ انہیں فاسٹ بولر بروڈی کاؤچ نے آؤٹ کیا۔ اننگز کے آغاز میں بابر اعظم کو ایک موقع ضرور ملا جب پہلے اوور میں ان کا مس ٹائم شاٹ مڈ آن اور مڈ وکٹ کے درمیان محفوظ گر گیا، تاہم وہ اس موقع سے فائدہ نہ اٹھا سکے۔
چند گیندیں کھیلنے کے بعد بابر نے ان فیلڈ پر دو رنز لے کر کھاتہ کھولا، لیکن تیسرے اوور کی پانچویں گیند پر ہارڈ لینتھ بال کو مڈ آن کے اوپر کھیلنے کی کوشش میں ان کے بلے سے لیڈنگ ایج لگا اور گیند فضا میں بلند ہو کر لاری ایونز کے ہاتھوں کیچ ہو گئی۔
بابر اعظم کے آؤٹ ہونے کے وقت سڈنی سکسرز کی ٹیم 2.5 اوورز میں 15 رنز پر 2 وکٹیں گنوا چکی تھی جبکہ اوپنر ڈینیئل ہیوز بھی پویلین واپس لوٹ چکے تھے۔
بابر کی وکٹ کے فوراً بعد بگ بیش لیگ کے آفیشل سوشل میڈیا اکاؤنٹ سے ان کی پہلی گیند پر کھیلی گئی ڈاٹ بال کی ویڈیو شیئر کی گئی، جس کے کیپشن نے سوشل میڈیا پر بحث کو جنم دے دیا۔ کچھ صارفین نے اسے ہلکے پھلکے انداز میں لیا، جبکہ کئی شائقین نے اسے نامناسب وقت پر کی گئی تنقید قرار دیا۔
سوشل میڈیا پر بعض صارفین نے سخت ردعمل دیتے ہوئے بابر اعظم کی اننگز کو مایوس کن قرار دیا جبکہ چند افراد کی جانب سے غیر مناسب زبان کا استعمال بھی دیکھنے میں آیا۔
اگرچہ بابر اعظم کی ابتدائی کارکردگی توقعات پر پوری نہیں اتر سکی تاہم بگ بیش لیگ میں پاکستانی کھلاڑیوں کی شرکت بدستور شائقین کے لیے دلچسپی کا باعث بنی ہوئی ہے۔ محمد رضوان، شاہین شاہ آفریدی اور حارث رؤف جیسے بڑے نام ابھی ٹورنامنٹ میں ڈیبیو کرنے والے ہیں جن کی شمولیت سے لیگ کی مقبولیت میں مزید اضافے کی توقع کی جا رہی ہے۔
