Get real time updates directly on you device, subscribe now.
اسلام آباد(مسائل نیوز) پاکستان تحریک انصاف کے رہنما اسد عمر کا کہنا ہے کہ پی ٹی آئی قومی اسمبلی میں اپوزیشن لیڈر بنانے کی پوزیشن رکھتی ہے۔ایک بیان میں انہوں نے کہا کہ اس وقت بھی ہمارے پاس اسمبلی کے اندر اراکین موجود ہیں۔ اسمبلی کے اندر موجود ہمارے اراکین اپوزیشن لیڈر بنا سکتے ہیں۔انہوں نے مزید کہا کہ ہم ساڑھے 9 ماہ کہتے رہے کہ استعفے منظور کیے جائیں۔
جس دن پتہ چلا کہ ہم اپوزیشن میں آرہے ، 3 دن میں 70 استعفے منظور کیے گئے۔ہمارا اولین مطالبہ تھا کہ تمام ایم این ایز کے استعفے منظور کیے جائیں۔اسد عمر نے کہا کہ 3،4 دن کے اندر بہت بڑی پیشرفت ہوئی ہے۔خیال رہے کہ اسپیکر قومی اسمبلی نے تحریک انصاف کے 34 ارکان اور شیخ رشید کے استعفے منظور کرلیے ہیں،ان 34 ارکان میں 32 منتخب ہوکر اور 2 خواتین کی مخصوص نشست پر ایوان میں آئے تھے۔
پاکستان ڈیموکریٹ موومنٹ نے اعلان کیا کہ ان نشستوں پر ہونے والے ضمنی الیکشن میں وہ حصہ نہیں لے گی تاہم پی ٹی آئی رہنما اسد عمر نے کہا کہ کیا پی ڈی ایم اتنی خوفزدہ ہوگئی ہے کہ ان 35 نشستوں پرانتخاب میں حصہ نہیں لیگی ضمنی انتخابات میں تمام نشستوں پر عمران خان الیکشن لڑیں گے۔ اس سے قبل قومی اسمبلی کی 8 نشستوں پر بھی 16 اکتوبر 2022 کو ضمنی الیکشن ہوئے تھے اور ان تمام نشستوں پر عمران خان خود کھڑے ہوئے تھے۔
ان 8 میں سے عمران خان 6 نشستیں جیتنے میں کامیاب رہے تھے جبکہ دو نشستوں این ای237 کراچی سے پیپلزپارٹی کے عبدالحکیم بلوچ اور این ای157 ملتان سے پیپلزپارٹی کے علی موسیٰ گیلانی کامیاب ہوگئے تھے۔عمران خان کو توشہ خانہ ریفرنس میں الیکشن کمیشن نے نا اہل کردیا تھا اور وہ فی الحال قومی اسمبلی کے رکن نہیں ہیں۔ مذکورہ 6 نشستوں پر کامیابی کا نوٹیفکیشن بھی الیکشن کمیشن نے اب تک جاری نہیں کیا ہے۔ذرائع کے مطابق انتخابی اخراجات کی تفصیلات نہ بتانے پر عمران خان کی کامیابی کا نوٹیفکیشن جاری نہیں کیا گیا ہے۔
